Жаночы погляд: 10 кніг на роднай мове ад беларускіх пісьменніц
Напярэдадні свята 8 Сакавіка прапануем вашай увазе падборку беларускай прозы ад нашых таленавітых суайчынніц. Дзеянне ў творах адбываецца ў розныя часы і пры розных абставінах, аднак тэмы кахання, пошуку сябе і жыццёвых арыенціраў застаюцца нязменнымі.
Пра аўтара
Мінчанка, апантаная аматарка беларускай літаратуры і культуры. Натхняецца прыгажосцю, прыродай і мастацтвам. Збірае ўласную бібліятэку, але часам забываецца, што чытаць кнігі і купляць іх — гэта розныя хобі.
Валянціна Коўтун «Крыж міласэрнасці»
Валянціна Коўтун, беларуская пісьменніца, паэтка, літаратуразнаўца, прысвяціла раман-дылогію «Крыж міласэрнасці» паэтцы Алаізе Пашкевіч (Цётцы). Падчас Першай сусветнай вайны Алаіза Пашкевіч як сястра міласэрнасці даглядала хворых на тыф у Віленскім ваенным шпіталі. На фоне вострасюжэтных падзей складанай эпохі ўзыходзяць паэзія і каханне. Па матывах кнігі ў свой час выйшла радыёпастаноўка, а таксама серыял.
Юлія Шарова «Вяртанне Ліліт»
Беларуская пісьменніца назвала сваю працу «астрапсіхалагічным раманам». Паводле зместу Ліліт, першая жонка Адама, якая мусіць бясконца ўвасабляцца ў зямных жанчын і жыць сярод людзей, раптам трапляе ў сталіцу Беларусі. У кнізе ёсць усё, што мы так любім апошнім часам, — карты Таро, блогеры, тэмы абуджэння ўнутранай Багіні, булгакаўшчына і ўтульны, крыху рэтраспектыўны, Мінск.
Паўліна Мядзёлка «Сцежкамі жыцця»
Тая самая актрыса, якой прысвяціў сваю п’есу «Паўлінка» Янка Купала, пакінула нам займальныя мемуары. На старонках кнігі Паўліна Вінцэнтаўна дзеліцца ўспамінамі пра ўласныя жыццёвыя выпрабаванні і дае магчымасць падгледзець за гістарычнымі асобамі і падзеямі ў Беларусі ХХ ст.
Алена Вешторт «Жамяра: жаночыя гісторыі»
Пра што думаюць сучасныя жанчыны? Гэтым пытаннем задаецца аўтар зборніка навел пра жыццё жанчын у Беларусі. Кожная гісторыя пазначана пэўным насякомым, у кнізе ёсць Авадзень, Труцень, Аса, Пчолка. Засталося толькі дазнацца, хто ёсць хто сярод плыні невытлумачальнай і часам непрадказальнай жаночай энергіі.
Саламея Пільштынова «Авантуры майго жыцця»
Саламея Рэгіна Русецкая лічыцца першай жанчынай-лекаркай у гісторыі Рэчы Паспалітай. Спадарыня Саламея шмат падарожнічала, умела зарабіць грошы на майстэрстве лячыць людзей, выцягвала з рознай калатнечы сваіх бесталковых мужчын і проста дапамагала людзям.
Ніна Лістота «Каханні»
Аўтарка сабрала дванаццаць гісторый кахання рэальных людзей, кожная з каторых мае свой каларыт і вынікі. Героі намагаюцца сумясціць каханне і побыт, пакутуюць, памыляюцца, страчваюць і знаходзяць сваё. Падзеі адбываюцца ў самых розных абставінах і даюць чытачам магчымасць паназіраць за беларускім рэаліці-шоу пра каханне.
Людміла Рублеўская «Дагератып»
Людміла Рублеўская вядомая чытачам сваімі гісторыка-прыгодніцкімі раманамі. Дзеянне рамана «Дагератып» пачынаецца ў наш час: малады біёлаг рыхтуецца з'язджаць за мяжу, але, разбіраючы рэчы ў дзедавай кватэры, знаходзіць стары дзённік, які пераносіць чытачоў у таямніцы правінцыйнага беларускага гарадка XIX ст.
Алена Брава «Садомская яблыня»
Шчырая, смелая і правакуючая кніга пад грыфам «18+» апавядае гісторыю тэлекаментатаркі з правінцыйнага канала, якая падавала надзеі ў маладосці, але занядбала ўласны талент праз няўдалае асабістае жыццё. Цяпер гераіні за сорак, і нібыта пара падводзіць вынікі ды вырашаць, што рабіць са сваімі марамі і амбіцыямі далей.
Таццяна Барысік «Жанчына і леапард»
Таццяна Барысік сабрала ў сваёй кнізе непрыдуманыя гісторыі з паўсядзённага жыцця беларускай правінцыі. Апавяданні прасякнутыя ўсёй гамай чалавечых пачуццяў і колерамі вясковага неба, блізкага, але часам нібыта бязлітаснага. Цікава, што сама пісьменніца паходзіць з горада, але ў свой час па накіраванні адпрацавала вясковай настаўніцай, калі і змагла «падгледзець» сюжэты для кнігі.
Каміла Цень «Я прыду за табой у аўгусце»
Наша «жаночая» падборка кніг была б няпоўнай без дэтэктыва. Асабліва такога, напісанага на трасянцы. Месцам дзеяння быў абраны Мінск, дзе кантралёрка грамадскага транспарту, звычайная жанчына, правярае талончыкі, а знаходзіць труп мужчыны. Некаторыя сцэны і дыялогі быццам былі спісаныя з нашага паўсядзённага жыцця, што вельмі падкупляе.
«Onlíner па-беларуску» ў Telegram. Моўныя вiктарыны, тэсты для аматараў вандровак i тэксты на роднай мове