Беларусы запусцілі марафон агучвання сказаў на роднай мове. Да праекта далучылася ўжо больш за 3000 дыктараў
Нагадаем, прыкладна тыдзень таму мы пісалі пра праект, які запусцілі беларусы. Гаворка ішла пра марафон агучвання сказаў на роднай мове. Што ж пра рэзультаты можна пачуць цяпер? Прыблізна 3000 чалавек агучылі дзясяткі тысяч беларускіх сказаў, і першае значнае дасягненне — мінімум у 100 гадзін, патрэбныя для працы сістэм распазнавання, быў пераадолены ўсяго за пяць дзён.
Палова сказаў з усіх моваў, што агучваюцца штодзённа на Common Voice, — беларускія. І яшчэ ёсць час, каб далучыцца, перад тым як дадзеныя стануць даступнымі для спампоўкі. За гэты час трэба назбіраць як мага больш галасоў беларусаў.
Марафон сабраў 130 гадзін за 7 дзён, а таксама больш за 3000 дыктараў.
Нагадаем, каманда праекта say.by «Мова прафесіі» пры падтрымцы адкрытых да супрацоўніцтва арганізацый і валанцёраў актывізавалі беларускую мову ў сусветным праекце Mozilla Common Voice і абвясцілі пра пачатак агучвання невялікіх сказаў.
Удзельнічаць у самім «марафоне» даволі проста і займальна:
- Трэба зайсці на сайт mova.pro (дзе можна пабачыць некаторыя парады, а таксама апошнюю статыстыку).
- Націснуць на спасылку «Ахвяруй свой голас беларускай мове тут».
- Пачаць агучваць або праслухоўваць сказы іншых людзей.
Наш канал у Telegram. Далучайцеся!
Ёсць пра што расказаць? Пішыце ў наш тэлеграм-бот. Гэта ананімна і хутка
