Напісаць дыктоўку і выйграць прыз. У суботу можна далучыцца да праекта «Агульная паштоўка»
Маштабная «Агульная дыктоўка» на беларускай мове праводзіцца з 2017 года. Спачатку ўдзельнікі збіраліся ў адной аўдыторыі, а цяпер да праекта можа далучыцца любы жадаючы анлайн. Так мінулая дыктоўка сабрала 1300 чалавек з 30 краін. На гэты раз падзея нават атрымала іншую назву — «Агульная паштоўка». Усё з-за зместу тэксту.
Пераднавагодняя дыктоўка будзе адпавядаць тэксту кранальных віншавальных паштовак. Узяць удзел максімальна проста: неабходна зарэгістравацца і 23 снежня ў 12:00 уключыць анлайн-трансляцыю. Патрэбныя будуць толькі ручка, аркуш паперы фармату А4 і гадзіна вольнага часу. Узрост і ўзровень валодання мовай значэння не маюць.
Пасля напісання фота ці скан ліста з тэкстам трэба загрузіць на сайт да 19:00 таго ж дня. Правяраць дыктоўку будуць філолагі. Вынікі павінны быць абвешчаныя на працягу некалькіх дзён. Тыя, хто напіша тэкст без адзінай памылкі, атрымаюць у падарунак набор з 5 паштовак ад беларускай мастачкі Таццяны Кісляковай. Выявы для іх былі распрацаваны спецыяльна для гэтага праекта.
Акрамя таго, арганізатары абяцаюць, што ўсе ўдзельнікі стануць суаўтарамі незвычайнага арт-аб’екта, прысвечанага самым любімым і блізкім кожнаму беларусу словам, які плануецца ўсталяваць у Лідзе.
«Onlíner па-беларуску» ў Telegram. Моўныя віктарыны, тэсты для аматараў вандровак і тэксты на роднай мове
