Венгрыя

Фарумчане паведамляюць, што вылавіць свабодныя даты на сайце візавага цэнтра і консульства Венгрыі амаль немагчыма, таму нямала людзей адразу ідуць у турфірмы.

— Атрымлівалі візу праз тур. У нашым аўтобусе, здаецца, былі ўсе, хто падаваўся з намі ў ВЦ. Па размовах падалося, што консул проста дадаў год да папярэдняй візы. У мяне была польская на тры гады, далі на чатыры. У каго ў пашпарце не было візы, паставілі аднаразовую. Хутчэй за ўсё, можна падавацца праз любую турфірму, якая працуе з венгерскім пасольствам, шанцаў атрымаць доўгі шэнген значна больш, чым пры самастойнай падачы, — піша беларуска.

Ёсць і гісторыя самастойнага запісу праз консульства ў Мінску. Мінчанін падаў дакументы 15 ліпеня, а пашпарт забраў роўна праз два тыдні. У хлопца была трохмесячная венгерская віза ў 2019 годзе і грэчаская ў гэтым (на 11 дзён).

— Прыклаў дакументы: білеты на фестываль Sziget-2022, набытыя незваротныя авіябілеты Варшава — Будапешт — Варшава і аўтобусныя Мінск — Варшава — Мінск, бронь хостэла з 10 па 16 жніўня, даведку з месца працы аб заработнай плаце, копіі папярэдніх віз. Да асноўнага пакета дакументаў па сваёй ініцыятыве прыклаў білет на Sziget-2019, авіябілеты і фота з фестывалю таго ж года, — расказвае ён.

У выніку малады чалавек атрымаў візу на год.

Грэцыя

Заяўкі на атрыманне візы можна падаць або праз грэчаскі візавы цэнтр у Мінску, або непасрэдна ў генконсульстве ў Маскве.

Мінскі візавы цэнтр Грэцыі ў гэтым сезоне працаваў бесперапынна, і нават у пачатку чэрвеня было шмат свабодных дат хоць на наступны дзень. Цяпер даты не такія даступныя, але шанцы запісацца вы маеце. Праўда, ёсць нюанс: грэкі не асабліва ахвотна выдаюць доўгатэрміновы шэнген, часцей адкрываюць візу на адно падарожжа.

Вось гісторыя Дзмітрыя. У мужчыны і яго сям’і раней былі гадавыя візы ў ЕС, а апошнія — двухгадовыя літоўскія шэнгены — скончыліся ў 2020-м. У 2019 годзе беларусы ездзілі ў Грэцыю на аўтамабілі на некалькі тыдняў, ёсць штампы. У канцы ліпеня Дзмітрый падаваў дакументы на шасцярых (траіх дарослых і траіх дзяцей) — у выніку ўсім адкрылі шэнген на год. Пашпарты даставілі дадому на 17-ты дзень пасля падачы.

— Рыхтавалі абсалютна стандартны набор дакументаў для паездкі на аўтамабілі, шмат разоў пералічаны на форуме. На нерухомасць нічога не падавалі, тлумачальны ліст консулу не пісалі. Усе броні былі з Booking.com і неаплачаныя. Паездка плануецца на 30 дзён. Зялёную карту зрабіў на 60, прыклаў, — пачынае аповед фарумчанін.

Цяпер ён дзеліцца назіраннямі (не толькі са свайго досведу) і лайфхакамі, як павысіць шанцы на атрыманне візы з больш працяглым тэрмінам дзеяння:

• Пакласці максімальна магчымую суму грошай на картку для даведкі з банка.
• Мець як мага большую зарплату ў даведцы з працы, асабліва ў апошнія пару месяцаў — як варыянт, можна папрасіць пералічыць квартальную прэмію крыху раней.
• Планаваць як мага больш працяглае знаходжанне ў Грэцыі (у Дзмітрыя і сям’і пазначана 22 дні з 30).
  Мець рэальны і добра прапрацаваны маршрут паездкі (у сям’і беларусаў былі тры атэлі/вілы ў Грэцыі, цікавыя і не самыя танныя атэлі па маршруце).
• Страхоўкі на адносна буйныя сумы (напрыклад, €50—60 тыс. на чалавека і з запасам мінімум у 15—20 дзён).
• Калі вы падаяцеся з дзецьмі, то верагоднасць адмовы значна ніжэйшая.

Зарэгістравацца на сайце ў нас атрымалася, але актываваць рахунак — не, таму бліжэйшыя вольныя даты засталіся для нас сакрэтам. Акрамя €35 за візу, грэчаскі візавы цэнтр спаганяе сэрвісны збор у беларускіх рублях — €30 у эквіваленце за пашпарт.

Германія

У першай палове чэрвеня пасольства ФРГ у Мінску аднавіла прыём дакументаў на турыстычныя візы. Гэта звязана з тым, што ў Германіі часова знялі каранавірусныя абмежаванні. Рэгістравацца на падачу дакументаў трэба анлайн, але давядзецца маніторыць даты.

Мяркуючы па паведамленні на форуме, 15 жніўня дакументы на візу падавалі дзве сястры па неафіцыйным запрашэнні ад траюраднай сястры.

— Дакументы — усе па спісе: копія пашпарта, копія апошняй візы, якая ёсць у пашпарце (яе вярнулі), раздрукаванае фота напісанага ад рукі запрашэння з копіяй ВНЖ і пашпарта, выпіска з карт-рахунку з пячаткай банка (без перакладу), даведка з працы аб вашай пасадзе і заробку за тры месяцы на рускай і з другога боку на англійскай мове, для ІП — копія пасведчання і выпіска з разліковага рахунку за тры месяцы са штампам банка (без перакладу), — пералічае адна з дзяўчат, якія падаваліся.

Анкету беларускі запаўнялі ў электронным фармаце, каля акенца ў візавым цэнтры прабылі прыкладна 20 хвілін.

— Калі ўсе дакументы падрыхтаваны добра, то атрымліваецца дастаткова хутка і пытанняў не шмат. Былі людзі, якіх адпраўлялі за адсутнымі дакументамі, — адзначае яна. — Пытанні задавалі такія ж, што і большасці: кім з’яўляецца запрашальнік, калі і чаму з’ехаў у Германію, ці ёсць яшчэ сваякі ў Германіі, калі плануецца першая паездка, на які тэрмін хочам візу, ці была да гэтага шэнгенская віза, калі была, то якая і куды па ёй ездзілі.

Яшчэ адна беларуска падавалася на нямецкі шэнген па запрашэнні мужа (немца) сваёй роднай сястры. У выніку жанчына атрымала мультывізу да 31 снежня, хаця запытвала на год.

— Запрашэнне неафіцыйнае, быў арыгінал, але там некарэктна пазначылі даты — у той жа дзень прынеслі яшчэ і скан, які даслаў зяць па імэйле. Падрыхтавалі ўсе дакументы па спісе. Білеты на самалёт нават не сталі глядзець. Што яна мая сястра, таксама нікому не цікава. Даведку з працы несла адразу на англійскай мове. Выпіску з рахунку сама падпісала рукой на англійскай, самі транзакцыі не перакладала. На карце было каля €2 тыс. (падаваліся я і дачка), і яшчэ выпіска з карты ў беларускіх рублях — там заставалася рэшта 400 рублёў. Да гэтага было шмат шэнгенскіх віз і шмат паездак, апошняя віза — двухгадовая літоўская.

Фарумчанка адзначае, што супрацоўнікі прымаюць дакументы ветліва, раяць і падказваюць. Калі чагосьці не хапае, адпраўляюць, каб данеслі.

Данія

У канцы мая мінскі візавы цэнтр Даніі спыняў прыём дакументаў, а праз два месяцы аднавіў. У ВЦ нам паведамілі, што папярэдні запіс для прадстаўлення заявы не патрэбны. Падача дакументаў магчымая па ўсіх катэгорыях віз, аднак, калі паездка плануецца з мэтай турызму, існуе верагоднасць адмовы. Дакументы ў дацкі візавы цэнтр прымаюць без папярэдняга запісу з 9 да 16 гадзін па буднях.

Варта таксама звярнуць увагу, што кошт візы ў Данію — €80, а не €35. Рэч у тым, што пасля новаўвядзенняў дадатковае пагадненне паміж Беларуссю і гэтай краінай пакуль яшчэ не заключана. Сэрвісны збор у ВЦ — €53.

Фарумчанка Вольга тэлефанавала ў дацкі візавы цэнтр — там адразу папярэдзілі, што выдача турыстычных віз для беларусаў ускладнена.

— Сказалі: можаце падавацца, але, хутчэй за ўсё, будуць адмовы, — адзначыла беларуска.

Так што варта падумаць, ці трэба звяртацца сюды, калі вы збіраецеся ў Еўропу як турыст.

Італія

Карыстальнікі форума паведамляюць аб праблемах з пошукам вольных дат праз сайт.

— Я ўжо некалькі дзён спрабую праз ВЦ і не бачу ніводнага свабоднага месца нават на люты — усе акенцы белыя. Потым мяне заблочаць на дзень. Можа, я нешта раблю не так? — задаецца пытаннем беларус.

Раней нашы чытачы раілі запісвацца ў італьянскі візавы цэнтр па жывой чарзе. Каля будынка працуюць валанцёры, якія фарміруюць спісы і потым апавяшчаюць у Viber, што пара прыходзіць. Таксама ёсць варыянт паспрабаваць запісацца непасрэдна праз пасольства Італіі — у некаторых такім чынам атрымлівалася моцна сэканоміць час і грошы.

А зараз пра вопыт выдачы італьянскіх шэнгенскіх віз. Фарумчанін падаваўся ў ВЦ 8 жніўня — на ўваходзе супрацоўнік узяў дакументы і напісаў тэрмін: на тры гады.

— Стандартны набор дакументаў, паездка на машыне. Аплачаныя броні жылля ў Італіі на 21 дзень і па дарозе ў краіну. Выпіска з бягучага рахунку з добрай рэштай у рублях і пару тысяч долараў. Вынік — аднаразовая віза на 15 дзён знаходжання з калідорам у месяц. Тэрмін візы меншы, чым аплачанае знаходжанне ў атэлі на тэрыторыі Італіі.

Яшчэ адна беларуска падавалася ў гэты ж дзень. Несла набор дакументаў, як і патрабуецца, а таксама пацверджаныя броні атэляў і авіябілетаў, мела выпіску з карт-рахунку на добрую суму.

— Дагэтуль было шмат віз — сем штук за сем гадоў, але ўзялі толькі адну за апошнія тры гады — польскую гадавую. Магчыма, гэта паўплывала. Шкада, не робяць скідку на тое, што ў кавід ніхто нікуды не ездзіў. Была гадавая італьянская віза, але таксама даўнейшая за тры гады. Вынік — мультывіза на шэсць месяцаў. Дзякуй, што не аднаразовая, але ўсё роўна крыўдна, вядома, — дзеліцца ўражаннямі фарумчанка.

Ёсць і больш пазітыўная гісторыя. Бацька фарумчаніна падаваў дакументы 28 ліпеня ў консульстве, пашпарт забраў 8 жніўня. Стандартны пакет дакументаў, даведка аб зарплаце за паўгода па 2 тыс. рублёў, выпіска з карты ў рублях з рухам сродкаў, выпіска з валютнай карты (рэшта — $3 тыс.: паклалі — знялі).

— Узялі і пасведчанні на нерухомасць, і маршрутны ліст, у апошнім паказалі паездку для іх з мамай (у мамы дзеючая польская віза, прыкладвалі яе копію і копію пашпарта). Страхоўка на 20 дзён, броні на Booking.com — усе неаплачаныя і адмяняюцца. Мінулыя візы — польскія на год, потым на два з паловай гады (скончылася ў 2021-м). Прасілі тры гады, далі на два.

Славакія

Падацца на славацкі шэнген можна двума спосабамі: ці па жывой чарзе, ці маніторыць вольныя даты на сайце візавага цэнтра.

— Хутчэй за ўсё, выкідваюць аўтаматычна ноччу ці зусім раніцай. Першы і апошні раз я бачыла вольныя акенцы ў панядзелак, 8 жніўня, у Гомелі, адразу на некалькі дат і некалькі вокнаў, — піша фарумчанка.

Яна не рэкамендуе мінчанам браць першыя даты ў Гомелі, лепш паспрабаваць злавіць у Мінску або папытаць шчасця ў жывой чарзе.

— Па жывой чарзе ў сталіцы адразу на ўваходзе з пачатку дня могуць патлумачыць сітуацыю: на некалькі дзён наперад усіх абтэлефанавалі і людзі будуць або, наадварот, невядома, ці ўсе прыйдуць, — адзначае жанчына.

Таксама ёсць паведамленні, што даты нярэдка з’яўляюцца ў дзённы час (дадаюцца некалькі разоў).

Яшчэ адзін беларус падаваў дакументы для паездкі ў Партугалію (Славакія выдае візы для гэтай краіны). Узяў броні авіябілетаў (некаторыя з іх выкупленыя), браніраванне атэляў (усе аплачаныя, прыкладаў пацвярджэнне з Booking.com, а таксама прасіў кожны атэль даслаць афіцыйнае пацвярджэнне браніравання з подпісам і пячаткай па электроннай пошце), страхоўкі, даведкі з месца працы і выпіскі з банка (крыху больш за €1 тыс. на чалавека).

— Дакументы ў ВЦ аддалі 28 ліпеня, а 1 жніўня ўжо атрымалі візы (на трэці працоўны дзень, уключаючы дзень падачы). Вынік — гадавыя візы. Да гэтага былі гадавыя Іспанія і Грэцыя. Вельмі задаволены вынікам. І па кошце добра ў параўнанні з іншымі краінамі, куды зараз не запісацца. Як аказалася, не так ужо складана падавацца на візу ў Славакію, — дзеліцца досведам фарумчанін.

«Onlíner па-беларуску» ў Telegram. Падпісвайцеся, каб не прапусціць нашы новыя тэксты на роднай мове

Перадрук тэксту і фотаздымкаў Onlíner без дазволу рэдакцыі забаронены. ng@onliner.by