Паглядзіце, як выглядае традыцыйны беларускі касцюм у сучасных рэаліях

12 688

17 июня 2021 в 14:10

Автор: Дарья Спевак

На YouTube выйшаў новы выпуск праекта, які раскрывае прыгажосць беларускага нацыянальнага строю ў сённяшніх рэаліях. Паглядзіце, як стыльна выглядаюць сучасныя беларускі ў старадаўніх касцюмах, якія насілі нашы продкі тры стагоддзі таму.

Гэта другі выпуск праекта «Традыцыйны строй», ён прысвечаны ўбранствам Маларыцкага краю. На відэа вы ўбачыце, як апраналіся беларускі, якія жылі ў вёсках Хаціслаў, Гвозніца і Збураж. Даведаецеся, як называецца тая ці іншая дэталь ладу.

Праект «Традыцыйны строй» — першая анлайн-энцыклапедыя аўтэнтычных традыцыйных касцюмаў Беларусі. Дзякуючы праекту вы ўбачыце, як апраналіся нашы продкі ў розных рэгіёнах краіны і што нацыянальнае адзенне беларусаў адрозніваецца не толькі ад вопраткі славянскіх суседзяў, але і ўнутры самой Беларусі мае істотныя асаблівасці. А яшчэ даведаецеся аб глыбокіх сэнсах, якія закладзены ў кожны элемент ладу.

Наступныя відэа будуць публікавацца на YouTube-канале «Традыцыя». Сам праект рэалізуецца на беларускай і англійскай мовах, што дазваляе дзяліцца нашай нацыянальнай эстэтыкай з замежнымі сябрамі. Праектам займаецца «ЭтнаТрадыцыя» сумесна з Цэнтрам вывучэння беларускай культуры, мовы і літаратуры Нацыянальнай акадэміі навук Беларусі.