«У мяне з сабой дзве бутэлькі гарэлкі! Пажарная! Дапамажыце!» З'явіўся мабільны дадатак, які дапамагае турыстам перакласці англійскую мову на беларускую
З'явіўся мабільны дадатак, які перекладае англійскую мову на беларускую. Гэта прафесійна агучаная версія беларускага размоўніка ў выглядзе мабільнага дадатку для Android і iOS. Таксама стваральнікі дадатку Say.by у супрацоўніцтве з арганізатарамі Еўрапейскіх гульняў пачынаюць распаўсюджваць адмысловыя буклеты з беларускімі выразамі.
— Акцэнт зроблены на найбольш ужывальныя выразы ў штодзённых размовах. Усяго ў мабільным дадатку налічваецца амаль 500 выразаў, агучаных як жаночым, так і мужчынскім галасамі з магчымасцю выбару. Для зручнасці і хуткага ўяўлення, як гучыць тое ці іншае слова, акрамя агучвання, была дададзена і англійская транслітарацыя, — распавядаюць стваральнікі перакладчыка. — У размоўніку ёсць як базавы набор слоў, так і тэматычны. Напрыклад, як пазнаёміцца з дзяўчынай ці хлопцам, зрабіць камплімент, прызнацца ў каханні. А таксама, што казаць у надзвычайных і праблемных сітуацыях.
«Адчапіся!», «Не чапай мяне!», «Як прайсці ў прыбіральню?», «Мне патрэбны адвакат», «Я не зрабіў нічога дрэннага». А ў тэме спорту можна знайсці выразы і да Еўрапейскіх гульняў. Не абышлося і без гумару, пры агучванні некаторыя фразы выпадкова складаліся ў смешныя дыялогі: «У мяне з сабой дзве бутэлькі гарэлкі! Пажарная! Дапамажыце!»
Над самім размоўнікам працавалі праграмісты, дызайнеры, ілюстратар — беларусы тутэйшыя і беларусы замежжа — што, у сваю чаргу, дало магчымасць праверыць чытэльнасць буклета і зручнасць выкарыстання мабільнага дадатку непасрэдна на іншаземцах.
Сачыў за правільнасцю беларускай мовы Інстытут мовазнаўства імя Якуба Коласа Нацыянальнай акадэміі навук Беларусі, а працу па агучванні ўзялі на сябе адмыслоўцы з gavarun.by, якія займаюцца прафесійным агучваннем фільмаў на беларускую мову. Акрамя размоўнікаў, у мабільным дадатку можна знайсці месцы, у якіх як з турыстамі, так і з беларусамі могуць размаўляць па-беларуску. Гэта аўтэнтычныя беларускія рэстараны і кавярні, крамы сувеніраў і іншыя месцы.
Наш канал у Telegram. Далучайцеся!
Хуткая сувязь з рэдакцыяй: чытайце паблік-чат Onliner і пішыце нам у Viber!
