«У нас гэта лічыцца дзікасцю». Гісторыя беларускі, якая к 33 гадам паспела стаць мамай шасцярых дзяцей

6894
15 июня 2023 в 16:18
Источник:  Дар'я Каско. Фота: Аляксандр Ружачка. Пераклад: Вікторыя Голубева

«У нас гэта лічыцца дзікасцю». Гісторыя беларускі, якая к 33 гадам паспела стаць мамай шасцярых дзяцей

Источник:  Дар'я Каско. Фота: Аляксандр Ружачка. Пераклад: Вікторыя Голубева

З Анастасіяй мы пазнаёміліся, калі шукалі вельмі занятых беларусаў. Дзяўчына напісала, што ў яе дзве працы і... шэсць дзяцей. Калі першаму даць веры было лёгка (падобных гісторый мы чулі нямала), то наяўнасць такой колькасці дзяцей выклікала вялікі сумнеў. Можа, узнікла непаразуменне? Некаторыя і хатніх жывёл называюць сваімі «дзеткамі». Але Насця пацвердзіла: сям’я сапраўды вялікая. А мы напрасіліся ў госці — пагаварыць пра графік, выхаванне і догляд за сабой. І галоўнае — разабрацца з міфамі, звязанымі са шматдзетным мацярынствам.

Міф першы: фігура пасля родаў ніколі не будзе ранейшай

Расповед пра сябе Насця пачынае з таго, што яна сама са шматдзетнай сям’і. І ваганняў наконт таго, ці хоча яна дзяцей, у яе не было ніколі.

— Першы раз я выйшла замуж у 18 гадоў. Была зусім не ўпэўненая ў сабе. Думала, калі не цяпер, то больш ніхто ўжо не прапануе, — смяецца дзяўчына.

Самае дзіўнае, што да нараджэння дзяцей Насця была нашмат паўнейшая. Пры мініяцюрным росце важыла 89 кілаграмаў. Пасля 30 маці шасцярых дзяцей меншая амаль напалову.

— Абавязкова пакажу вам фотаздымкі! — інтрыгуе гераіня.

Чацвёра старэйшых дзяцей — пагодкі. Іх Насця нарадзіла ў першым шлюбе. Старэйшаму — Марку — цяпер 14. Далей ідуць Данііл, Канстанцін і Валерыя. Малым — Яраславу і Вікторыі — 7 і 5 гадоў.

— Пасля нараджэння другога дзіцяці я наважылася прывесці сябе ў форму. Проста хацела быць як дзяўчаты майго ўзросту. Бо нават на пляжы не магла распрануцца: адчувала сябе вельмі некамфортна.

Праграму пахудзення прыдумала сама: кожны дзень праходзіла па 12 кіламетраў з каляскай з двума дзецьмі. Ела толькі гародніну і садавіну — акурат было лета. І ўсяго толькі за тры месяцы скінула вагу да 53 кілаграмаў. Але якасць цела была не такой, як мне хацелася, таму я пайшла на тайскі бокс.

Рацыён з часам стаў больш разнастайным. Але мне проста не патрэбныя такія порцыі, як раней, — не хочацца. Калі падлеткам я магла з задавальненнем з’есці палову бляхі булачак, то цяпер гэтая цяга прайшла. І пасля ніводных родаў я ўжо так не папраўлялася.

Цяпер Насцю рэгулярна прымаюць за сястру, а не маці яе дзяцей. Часам нават даводзіцца актыўна даказваць, якая ў іх насамрэч ступень сваяцтва. Пры гэтым да касметолага наша гераіня звярталася толькі аднойчы — па паказаннях. Але яна абавязкова кожны дзень знаходзіць час для хатняга догляду за сабой — дзеля ўласнага задавальнення. Асабісты лайфхак толькі адзін: касметыку яна змывае чыстай вадой без усялякіх сродкаў. Хаця не, ёсць яшчэ адзін, звязаны са здароўем: Насця наогул не прымае лекаў — толькі ў якасці самых рэдкіх выключэнняў.

Удакладняем, ці падзяляе шматдзетная маці меркаванне, што роды амалоджваюць арганізм?

Насця з гэтым згодная: усе цяжарнасці працякалі ў яе даволі лёгка. Плюс з’яўляецца нагода задумацца пра сваё здароўе і прайсці поўнае абследаванне. Але наша суразмоўніца падкрэслівае: гэта толькі прыватны выпадак і яе асабістая думка.

Міф другі: дзеці і кар’ера дрэнна сумяшчальныя

У поўным дэкрэце Насця была толькі адзін раз — з малодшай дачкой. І тое — фармальна. Якраз тады пачаўся шлях да кар’ернага росту. У астатні час яе хапала ўсяго на пару месяцаў дома.

— Сядзець дома для мяне — вось што сапраўдны жах. Я ўжо паспрабавала сябе ў самых розных сферах: ад гандлю да рамонту абутку. Да з’яўлення танных абутковых крамаў гэта было вельмі прыбытковай справай. Дома ў мяне стаяў стол, за якім я дарабляла замовы.

Цяпер Насця — дырэктар фірмы па абслугоўванні каршэрынгавых аўтамабіляў. Працу кіраўніка яна без сарамлівасці сумяшчала з пасадай касіра ў адной з сеткавых крамаў.

— Мой дзень пачынаецца а 7-й. Праца касірам з графікам 2/2 з 9 да 18. А другая праца — у начную змену, з 9 вечара і да раніцы. Так што ў некаторыя дні сон практычна не прадугледжаны.

Насця трапіла ў гэты бізнес дзякуючы мужу. Ён сам займаўся сухой хімчысткай аўтамабіляў. А ў жонкі з’явілася вялікая цікавасць да справы. Спачатку практычна без аплаты пачала з падбору персаналу і паступова дарасла да дырэктара. Цяпер яна непасрэдны начальнік у мужа, што, па словах абаіх, на стасункі ў пары ніяк не ўплывае.

— У нас атрымліваецца дакладна размяжоўваць, дзе сям’я, а дзе праца. І з самага пачатку было зразумела, што менавіта ў Ільі сям’я — прыярытэт, у той час як я заўсёды імкнулася да кар’еры. Малодшую дачку мяне ўгаварыў нарадзіць муж. Але мы адразу дамовіліся: усе начныя пад’ёмы — толькі на ім. Так усё і было. Гатуе ў нашай сям’і таксама звычайна муж.

— А не складана было пераключацца з ролі кіраўніка ў ролю падпарадкаванага?

— У мяне няма кароны на галаве. У любой справе ёсць дакладныя правілы, якіх ты мусіш прытрымлівацца. І ўсё будзе ў парадку. Ды і як дырэктар я вельмі лаяльная. Магу сказаць: як жыццё, коцікі? Як вы там, булачкі мае? І калі трэба, сама дапамагу мыць машыну. А яны мяне паважаюць і надоўга застаюцца ў фірме. Пры гэтым і працаваць на касе мне шчыра падабалася. Так што ніякіх сакрэтаў: толькі чалавечыя стасункі на роўных — чым бы ты ні займаўся.

Міф трэці: у шматдзетнай сям’і дзеці застаюцца без увагі

Што тычыцца дзяцей, у Насці такая ж філасофія: з імі трэба мець зносіны на роўных.

— Я дзецям усё кажу прама. У мяне ёсць свая праца, у іх свая — гэта вучоба і абавязкі па хаце. Калі яны хочуць нешта атрымаць, гэта трэба зарабіць. Усё як у жыцці. Пры гэтым я не прымушаю іх гнацца за адзнакамі. Як казаў Марк Твен, «я ніколі не дазваляў школе ўмешвацца ў маю адукацыю». А яшчэ надзвычай важна прызнаць, што дзеці розныя, у кожнага свой характар. Яны не могуць паводзіць сябе аднолькава. Калі гэта прымаеш, становіцца значна прасцей.

Галоўнае, што бацькі імкнуцца прывіць сваім дзецям, — гэта самастойнасць. І клопат адзін пра аднаго. Таму нават у пачатковай школе ўрокі ўсе робяць самі.

— Насамрэч, у вялікай сям’і дзеці шмат чаму вучацца адзін ад аднаго. Пакуль старэйшы лічыў палачкі ў першым класе, малодшы круціўся побач і таксама ўсё запомніў. Ды і ў цэлым, калі дзяцей у сям’і шмат, іх прасцей выхоўваць. Яны самі сябе займаюць, а не патрабуюць сталага нагляду дарослых. Пры гэтым ім дастаткова і зносін, і ўвагі — не толькі ад бацькоў, але і ад братоў і сясцёр. Не разумею, чаму гэта рэдка ўлічваюць?

Міф чацвёрты: з дзецьмі нельга ўладкаваць асабістае жыццё

Не можам не задаць далікатнае пытанне: а пасля разводу не страшна было застацца з чатырма дзецьмі адной?

— Не. У мяне ж ужо была свая сям’я — мае дзеці. Так што я не была адна. Ды і зусім не хацелася адносін, без іх было прасцей. Не трэба па ўсёй кватэры збіраць чужыя шкарпэткі, — усміхаецца Насця.

Але меркаванне — гэта адно, а рэальнасць — зусім іншае. Гісторыя знаёмства Насці і Ільі як у серыяле. Спачатку ён пісаў ёй у сацсетцы, але быў заблакаваны: маладая маці тады была яшчэ ў першым шлюбе. А праз колькі гадоў знаёмыя папрасілі Насцю ненадоўга пусціць пажыць хлопца, праездам з Піцера. І ім аказаўся Ілья.

— Дзверы майго дома заўсёды адчыненыя. Стаяла лета, дзеці ў бабуль. Таму я пагадзілася без праблем. К таму моманту я ўжо каля трох гадоў была без адносін. Ілья адразу пачаў вельмі прыгожа заляцацца. У нас пачаўся раман, але я хутка зразумела, што гэта мне не патрэбна. Я не была гатова да стасункаў. Ды і ён здаваўся мне проста хлопчыкам, хоць розніца ва ўзросце ў нас усяго два гады. 

Нечаканым паваротам аказалася цяжарнасць Насці. Але сваё рашэнне яна не змяніла: зноў сыходзіцца з хлопцам не планавала і вырашыла выхоўваць дзіця ў вялікай сям’і сама.

— Калі сыну быў год, Ілья прыехаў і сказаў: я хачу быць з табой. І дзеля гэтага пайду на ўсё. 

Разам сям’я ўжо 6 гадоў.

— А вас зусім не палохала такая колькасць дзяцей? Гэта ж вялікая адказнасць, — удакладняем у Ільі.

— Вядома, адразу такія думкі былі. Грамадства ў цэлым не прымае мой учынак, гэта чамусьці лічыцца дзікасцю. Але калі я кахаю чалавека, чаму я не магу любіць яго дзяцей?

Ілья спакойна прызнае, што яму патрэбен чалавек, які б яго накіроўваў. І Насця ідэальна з гэтым спраўляецца — толькі пачуцці да яе змаглі яго спыніць, інакш бурная маладосць магла б працягвацца да пенсіі.

— А вам хутка ўдалося наладзіць кантакт з дзецьмі? 

— Так, яны ж тады былі зусім маленькімі. Ён іх адразу пакарыў сваімі кухарскімі здольнасцямі. Але цяпер такія складаныя стравы чамусьці не гатуе, — жартуе з мужа Насця. Дзеці шмат гадоў называюць Ілью татам.

Міф пяты: ранняе бацькоўства ставіць крыж на цікавым жыцці

Зразумела, што асабістыя гісторыі таксама не ведаюць умоўнага ладу, таму разважаць «а што б было, калі...» Насцю не просім. Але пытаемся, якія парады яна будзе даваць уласным дочкам.

— Я лічу, што аптымальны час для стварэння сям’і — 20—21 год. І так, трэба імкнуцца ствараць менавіта сям’ю, а не адносіны. Якая альтэрнатыва: марнаваць маладосць? Калі энергіі і здароўя максімум, гэты час якраз можна прысвяціць дзецям. А калі яны падрастуць, ужо свядома будаваць кар’еру і жыць для сябе.

У мяне шмат знаёмых дзяўчат, якія раней не думалі пра сям’ю, а зараз не атрымліваецца. І ў мяне да іх адно пытанне: а што вы рабілі да 30? Якія такія важныя справы ў вас былі? Калі ж з дзецьмі невялікая розніца ва ўзросце, з імі можна выбудоўваць даверлівыя сяброўскія адносіны.

А часу для сябе будзе дастаткова. Асабіста я планую пражыць да 120. У мяне ёсць адпаведная схільнасць: бабулі 90 — і вы б бачылі яе агарод! Мой баявы характар якраз ад яе.

Паўторым словы нашай гераіні: уся гісторыя — толькі яе асабістае меркаванне, якое атрымлівае вось такое ўвасабленне ў рэальнасці.

Onlíner рекомендует
влажная уборка, Mi Home/Яндекс Алиса, мощность 45 Вт, сила всасывания 4000 Па, пылесборник 0.3 л, с турбощеткой (неразборная), навигация: контактный бампер, лидар, датчики перепада высоты, план нескольких этажей
Выбор покупателей
Onlíner рекомендует
влажная уборка, Mi Home, мощность 55 Вт, сила всасывания 4000 Па, пылесборник 0.45 л, с турбощеткой (разборная), навигация: контактный бампер, лидар, камера TOF (3D), датчики перепада высоты, план нескольких этажей
Onlíner рекомендует
влажная уборка, Mi Home/Яндекс Алиса, мощность 40 Вт, сила всасывания 2500 Па, пылесборник 0.6 л, с турбощеткой (разборная), навигация: контактный бампер, камера VSLAM, датчики перепада высоты

«Onlíner па-беларуску» ў Telegram. Падпісвайцеся, каб не прапусціць нашы новыя тэксты на роднай мове

Перадрук тэксту і фотаздымкаў Onlíner без дазволу рэдакцыі забаронены. ng@onliner.by