Прышэльцы, вядзьмар, хадзячыя мерцвякі. Што паглядзець у чэрвені

22 976
04 июня 2023 в 8:00
Источник: Зміцер Адашкевіч

Прышэльцы, вядзьмар, хадзячыя мерцвякі. Што паглядзець у чэрвені

Источник: Зміцер Адашкевіч

Першы летні месяц будзе дзіўным. Стрымінгавыя сэрвісы запланавалі мноства патэнцыйна цікавых серыялаў, а вось выдатных поўнаметражных стужак не прадбачыцца. Таму сёння засяродзімся толькі на шматсерыйных праектах. Пагаворым як пра навінкі, так і пра вельмі чаканыя працягі.

«Заснавана на рэальных падзеях» (з 8 чэрвеня на Peacock)

Міні-серыял у жанры камедыйнага трылера, што раскажа пра сям’ю Натана і Авы, якія жывуць у Лос-Анджэлесе. Ён калісьці быў зоркай тэніса, але зараз працуе сантэхнікам. Яна марыла стаць знакамітасцю, а ў выніку прадае нерухомасць. Спрабуючы выратаваць шлюб і разбагацець, пара запускае падкаст пра серыйных забойцаў. Падкаст, які і праўда зменіць іх жыцці, але не факт, што гэтыя змены прыйдуцца даспадобы.

Аўтарам серыяла выступіў Крэйг Розенберг, які таксама датычны да стварэння «Дзецюкоў» і «Прапаведніка». Паводле яго слоў, ідэя новага серыяла прыйшла на фоне моднай канцэнтрацыі масавай культуры на адлюстраванні рэальных злачынстваў. Час, калі забойцы сталі знакамітасцямі, а знакамітасці — забойцамі.

«Перапоўнены пакой» (з 9 чэрвеня на Apple TV+)

Праект, натхнёны кнігай «Шматлікія розумы Білі Мілігана», якая, у сваю чаргу, грунтуецца на рэальнай гісторыі жыхара ЗША. Мужчына быў арыштаваны ў 1970-х гадах па абвінавачанні ў некалькіх згвалтаваннях і рабаваннях. Аднак упершыню ў гісторыі яго апраўдалі дзякуючы дыягназу «дысацыятыўнае засмучэнне асобы». Лічыцца, што ў ягонай свядомасці ўжываліся адразу 24 асобы, ад югаслаўскага камуніста да дзяўчыны-лесбіянкі.

Гэтую гісторыю ўжо часткова запазычыў для свайго фільма «Спліт» М. Найт Ш'ямалан. Цяпер жа настаў час 10-серыйнай стужкі. Спачатку планавалася, што «Перапоўнены пакой» стане прамой адаптацыяй рэальнай гісторыі, але ў выніку аўтары ўсё ж змянілі мноства дэталяў, аддаліўшыся ад сапраўдных падзей. Над серыялам працавалі сцэнарысты і рэжысёры «Гульняў розуму», «Кода да Вінчы» і «Фрагментаў жанчыны». У галоўнай ролі зняўся сёння вельмі модны Том Холанд, вядомы па вобразе «Чалавека-павука».

«Апякальна гарачы» (з 9 чэрвеня на Hulu і Disney+)

1990-я, вытворца чыпсаў Cheetos ледзь зводзіць канцы з канцамі і рыхтуецца да банкруцтва. У гэтыя смутныя часы ў кампанію ў якасці прыбіральшчыка прыходзіць няўдачнік Рычард Мантаньес. Неардынарны мужчына неўзабаве стане галоўным маркетолагам і, здаецца, прыдумае вострыя чыпсы Cheetos. Яны не толькі выратуюць кампанію ад банкруцтва, але нават на некаторы час стануць культурным феноменам.

Гісторыя заблытаная, тым больш цікава, што атрымалася ў серыяле. Рэч у тым, што пару гадоў таму вытворца Cheetos афіцыйна заявіў: легендарны смак быў прыдуманы іншым супрацоўнікам на іншым заводзе. Мантаньес жа нібы прысвоіў чужыя лаўры. Паглядзім, ці знойдзе гэтая версія адлюстраванне ў серыяле.

«Мужчынскі стрыптыз» (з 14 чэрвеня на Hulu)

Магчыма, вы памятаеце аднайменную брытанскую камедыю з 1990-х. Фільм распавядаў пра працоўных сталеліцейнага завода ў мястэчку Шэфілд. Прадпрыемства закрылася, і рабочыя, каб пракарміць сем'і, вырашылі арганізаваць уласнае стрыптыз-шоу. Атрымалася даволі весела і павучальна, ды яшчэ і «Оскара» за саўндтрэк адхапілі.

Новы «Мужчынскі стрыптыз» — прамы працяг гісторыі. Прайшло 25 гадоў, сталявары-стрыптызёры ўсё яшчэ жывуць у Шэфілдзе, аднак за гэтыя гады жыццё кожнага з іх моцна змянілася. А вось акцёрскі склад застаўся тым жа, уключаючы Роберта Карлайла і Тома Уілкінсана.

«Чорнае люстэрка», шосты сезон (з 15 чэрвеня на Netflix)

Шосты сезон, у якога, як звычайна, не будзе нічога агульнага з папярэднімі выпускамі. Усяго пакажуць пяць серый, кожная з якіх паспрабуе абазначыць якую-небудзь надзённую асаблівасць грамадства. Адзін з эпізодаў, напрыклад, раскажа пра звычайную жанчыну, якая аднойчы знаходзіць экранізацыю свайго жыцця на стрымінгавым сэрвісе.

Раней аўтар серыяла сцвярджаў, што шосты сезон будзе зроблены з кінематаграфічным размахам і кожная серыя па сутнасці будзе асобным поўнаметражным фільмам. Што ж, прынамсі акцёраў з «вялікага кіно» прывабіць атрымалася. Убачым і Сальму Хаек, і Джоша Хартнэта, і Кейт Мару, і Аарана Пола, і Майкла Сера, і Зазі Бітц. Адназначна адна з топавых чэрвеньскіх прэм’ер.

«Хадзячыя мерцвякі: Мёртвы горад» (з 18 чэрвеня на АМС)

Адзін з трох запланаваных спінофаў галоўнага серыяла AMC «Хадзячыя мерцвякі». У адрозненне ад арыгінала, нас не будуць мучыць дзясяткам сезонаў, сярод якіх адзін горшы за другі. У «Мёртвым горадзе» абяцаюць закончаную гісторыю, якую змясцілі ў шасці серыях.

У цэнтры ўвагі — Мэгі і Ніган з арыгінальнага серыяла. Там у іх адносіны складваліся, мякка кажучы, не вельмі, але ў «Мёртвым горадзе» ім прыйшлося аб'яднацца, каб выжыць у Нью-Ёрку. Горад наводнены зомбі і разнамаснымі бандамі тых, хто выжыў. Увогуле, антураж як у «Хадзячых мерцвяках», але ва ўмовах шчыльнай гарадской забудовы, якой не хапала арыгіналу.

«Сакрэтнае ўварванне» (з 21 чэрвеня на Disney+)

Адзін з самых чаканых і дарагіх серыялаў года, заснаваны на коміксах Marvel. У першую чаргу ўражвае вялізная колькасць занятых у праекце зорак. Так, у галоўнай ролі зняўся Сэмюэль Л. Джэксан, таксама на экране тэлевізараў можна будзе пабачыць Бэна Мендэльсана, Эмілію Кларк, Алівію Колман, Марціна Фрымана.

Серыял раскажа пра былога дырэктара арганізацыі S.H.I.E.L.D. Ніке Ф'юры, які з дапамогай лідара іншапланетнай расы скрулаў спрабуе спыніць групу прышэльцаў. Яны ўмеюць прымаць любое аблічча і ўкараніліся ва ўрадах вядучых краін свету, а таксама ў найбуйнейшых карпарацыях. Многія прыкідваюцца супергероямі, і ніхто не можа распазнаць, дзе сапраўдны чалавек, а дзе — замаскіраваны скрул.

«Я — Дзева» (з 23 чэрвеня на Amazon Prime Video)

Абсурдысцкая камедыя пра прыгоды чатырохметровага чарнаскурага хлопца. Сваякі доўга трымалі яго дома пад замком, баючыся, што ў грамадстве падлетак стане ізгоем. Але аднойчы волат выйшаў на вуліцу, каб убачыць свет і заадно сустрэцца са сваім кумірам — супергероем па імі Герой.

Па дарозе галоўны герой сустрэне палітычных актывістаў, наркаманаў і мноства дзіўных асоб. Са слоў журналістаў, якія ўжо паглядзелі пару серый, «Я — Дзева» атрымаўся нядрэннай і вынаходлівай сатырай на сучасны свет.

«Захоплены рэйс» (з 28 чэрвеня на Apple TV+)

Тэрарысты захопліваюць самалёт, які ляціць з Дубая ў Лондан. Уся надзея на дасведчанага дзелавога перагаворшчыка Сэма. Вось толькі ці спатрэбяцца яго бізнес-навыкі ў зносінах са злачынцамі? Для выратавання пасажыраў у яго ёсць усяго сем гадзін.

Час — галоўная асаблівасць гэтага серыяла. Усе падзеі тут раскрываюцца ў рэжыме рэальнага часу. Гэта значыць сем гадзін палёту — сем серый «Захопленага рэйса» па адной гадзіне кожны. Роля перагаворшчыка дасталася Ідрысу Эльбе («Праслушка», «Лютар»). Над праектам працавалі стваральнікі міні-серыяла «Літвіненка».

«Вядзьмар», трэці сезон (з 29 чэрвеня на Netflix)

Галоўны фэнтэзійны серыял года. А яшчэ — трэці і апошні сезон, у якім Геральта іграе Генры Кавіл. Далей (а чакаюцца яшчэ як мінімум чацвёрты і пяты сезоны) ужо будзе Ліам Хемсворт, які, дарэчы, першапачаткова на гэтую ролю і праслухоўваўся. Што тычыцца сюжэта трэцяга сезона, то ён грунтуецца на чацвёртай кнізе з цыкла «Вядзьмар» пад назвай «Час пагарды».

Мяркуючы па ўсім, падзеі будуць звязаныя з тэмерскай школай чараўнікоў Артэзай. Спачатку Геральту, Еніфер і Цыры давядзецца да яе дабрацца, а потым — разабрацца з пераваротам. Сезон складаецца з васьмі эпізодаў, выпуск якіх падзелены на дзве часткі: першыя пяць серый пакажуць 29 чэрвеня, а астатнія тры трэба будзе пачакаць яшчэ амаль месяц.

Выбор покупателей
43" 3840x2160 (4K UHD), матрица VA, частота матрицы 60 Гц, Smart TV (Android TV), HDR10, Dolby Vision, HLG, Dolby Atmos, Wi-Fi
Выбор покупателей
55" 3840x2160 (4K UHD), матрица VA, частота матрицы 60 Гц, Smart TV (Android TV), HDR10, Dolby Vision, HLG, Dolby Atmos, Wi-Fi
65" 3840x2160 (4K UHD), частота матрицы 120 Гц, Smart TV (LG webOS), HDR10, HLG, AirPlay, Wi-Fi

«Onlíner па-беларуску» ў Telegram. Моўныя віктарыны, тэсты для аматараў вандровак і тэксты на роднай мове

Ёсць пра што расказаць? Пішыце ў наш тэлеграм-бот. Гэта ананімна і хутка