«Сантэхнікі Белага дома» (з 1 траўня на HBO)

Мінісерыял, які распавядае пра падрабязнасці Уотэргейцкага скандалу, у выніку якога амерыканскі прэзідэнт Рычард Ніксан быў вымушаны сысці ў адстаўку. Праект грунтуецца на ўспамінах адваката Эгіля Крога, які працаваў у адміністрацыі Ніксана.

Аўтары аддалі перавагу несур'ёзнаму стылю апавядання. У цэнтры ўвагі — група аператыўнікаў, чые дзеянні і прывялі да Уотэргейта. Пару няўдачлівых сілавікоў сыгралі Вудзі Харэльсан і Джасцін Тэру.

Прэм'еру серыяла некалькі разоў пераносілі, нават прапусцілі 50-годдзе падзеі. Мяркуючы па не вельмі высокіх адзнаках, праект да апошняга спрабавалі дапрацаваць. «Сантэхнікаў» лаюць за слабую ігру Харэльсана і жартаўлівы тон, якога, з аднаго боку, недастаткова для сапраўднай камедыі, а з другога — празмерна шмат для адлюстравання сур'ёзнай падзеі.

«Каралева Шарлота: Гісторыя Брыджэртанаў» (з 4 траўня на Netflix)

Прыквел серыяла «Брыджэртаны» пра тое, як вяселле маладой каралевы Шарлоты і караля Георга становіцца пачаткам легендарнай гісторыі кахання і змяняе вышэйшае грамадства. Шарлоту чакаюць інтрыгі і непрыязнасць з боку маці караля.

Тры гады таму «Брыджэртаны» нечакана сталі хітом Netflix. Цяпер ідзе праца над трэцім сезонам касцюміраванай драмы, цікавасць да якой вырашылі падагрэць з дапамогай прыквела. Над усімі «Брыджэртанамі» працуе адна каманда, таму прыхільнікі павінны застацца задаволеныя.

Ды і ў прафесіяналаў стаўленне да двух «Брыджэртанаў» аднолькавае. У прыквела на Metacritic тыя ж 77 балаў, што і ў арыгінала.

«Аднарог: Вечныя воіны» (з 4 траўня на Adult Swim)

Новая работа славутага мультыплікатара Гендзі Тартакоўскага. Яго вы можаце ведаць па такіх мультфільмах, як «Першабытны» і «Самурай Джэк». Ён жа працаваў над «Монстрамі на вакацыях» і «Кланічнымі войнамі».

«Аднарог: Вечныя воіны» — фэнтэзі з прымессю стымпанка. Падзеі развіваюцца ў альтэрнатыўным сусвеце ў Лондане XVIII стагоддзя. Воін-эльф, касмічны манах і чараўніца на працягу тысяч гадоў ваявалі са злом. Аднак аднойчы яны апынуліся ў целах падлеткаў і цяпер не толькі смутна памятаюць пра сваю місію, але і слаба кантралююць свае звышнатуральныя сілы.

«Бункер» (з 5 траўня на Apple TV+)

Навукова-фантастычны серыял Apple, які грунтуецца на раманах Х'ю Хоўі. Недалёкая постапакаліптычная будучыня, атмасфера на Зямлі стала настолькі небяспечнай, што тых, хто выжыў, засталося зусім няшмат. Дзеянні «Бункера» адбываюцца ў вялізнай шахце глыбінёй 144 паверхі. Тут жывуць апошнія на планеце 10 тысяч чалавек.

Ніхто з іх не памятае, што сталася з планетай і хто пабудаваў бункер. Затое на велізарных экранах усім паказваюць знежывелыя пейзажы паверхні. Зразумела, усё не так адназначна, і неўзабаве нехта паспрабуе даведацца ўсю «шакуючую праўду».

Галоўны твіст лёгка адгадваецца яшчэ на этапе прачытання кароценькага апісання сюжэту. Але першыя водгукі даволі пахвальныя. На момант напісання матэрыялу ў «Бункера» было 82 балы са 100 на Metacritic. Праўда, на аснове ўсяго чатырох рэцэнзій.

«Рыцар у чорным» (з 12 траўня на Netflix)

Паўднёвакарэйская фантастычная драма з бюджэтам $20 мільёнаў, як у «Гульні ў кальмара». Падзеі серыяла адбываюцца ў 2071 годзе. Праз забруджванне паветра чалавецтва вымерла, выжыла каля 1% насельніцтва планеты. Пакінутыя ў жывых практычна не выходзяць з хат, а іх існаванне цалкам залежыць ад кур'ераў. Гэта самыя адважныя і моцныя людзі, гатовыя не толькі дастаўляць пасылкі, але і бараніць іх ад банд марадзёраў.

Сюжэт пераклікаецца з Death Stranding. Пасля прагляду трэйлера некаторыя нават вырашылі, што гэта вольная адаптацыя гульні. Але не, нягледзячы на падабенства цэнтральнай ідэі, «Рыцар у чорным» грунтуецца на самастойнай гісторыі, расказанай у аднайменным лічбавым коміксе.

«Маліган» (з 12 траўня на Netflix)

Дзеянне гэтай сатырычнай камедыі адбываецца на Зямлі, большую частку якой паспелі знішчыць іншапланецяне. Ці змогуць людзі, якія выжылі, аднавіць Амерыку і стварыць больш дасканалы саюз?

Галоўны герой — Мэт Маліган. Яму ўдалося спыніць уварванне, таму яго выбіраюць прэзідэнтам ЗША. Першай лэдзі краіны становіцца яго каханая, каралева прыгажосці Люсі.

Яшчэ адна спроба стрымінгавых сэрвісаў запусціць камедыйны мультсерыял для дарослай аўдыторыі. У апошнія гады з гэтай задачай чамусьці справіцца не атрымліваецца.

«Дэтэктыў пад кайфам» (з 17 траўня на Apple TV+)

Патрысія Аркет іграе наркаманку ў завязцы, якая вырашыла кардынальна змяніць сваё жыццё і стала прыватным дэтэктывам у маленькім пустэльным мястэчку Юкка-Вэлі. Гісторыю абяцаюць змясціць у восем серый, так што другога сезона, хутчэй за ўсё, не будзе.

Над праектам працавала каманда, якая ведае толк у камедыях. «Дэтэктыў пад кайфам», дарэчы, пазіцыянуецца як чорная камедыя. Акрамя Патрысіі Аркет, тут можна будзе ўбачыць Мэта Дылана. Прадзюсарам серыяла выступіў Бэн Стылер, а рэжысіраваў усе серыі Джэй Роўч, у партфоліа якога ёсць «Знаёмства з бацькамі» і «Остын Паўэрс».

«Амерыканец кітайскага паходжання» (з 24 траўня на Disney+)

Вельмі цікаўны праект хоць бы таму, што ў ім зняліся адразу тры зоркі нядаўняга інды-хіта «Усё ўсюды і адразу» — аскараносныя Мішэль Ео і Ке Хюі Куан, а таксама Стэфані Сюй.

«Амерыканец кітайскага паходжання» — камедыйная экранізацыя аднайменнага графічнага рамана, які атрымаў Прэмію Айснера, самую прэстыжную ўзнагароду ў індустрыі коміксаў. У цэнтры ўвагі — старшакласнік Джым Ван, жыццё якога аказваецца цесна пераплецена з багамі кітайскага пантэона. Будзе шмат жартаў, спецэфектаў і баявых сцэн у фэнтэзійным антуражы.

«Платанічныя адносіны» (з 24 траўня на Apple TV+)

Яшчэ адна камедыя, і зноў на Apple TV+. На гэты раз, праўда, не толькі каб пасмяяцца, але і каб крыху патужыць.

Саракагадовыя героі Сэта Рогена і Роўз Бірн — былыя лепшыя сябры, якія зноў пачынаюць зносіны пасля сваркі і доўгага перапынку. Іх платанічныя адносіны пахіснуць звыклы жыццёвы ўклад і прывядуць да мноства цікавых перыпетый.

«Платанічныя адносіны» сталі трэцяй сумеснай працай рэжысёра Нікаласа Столера, а таксама акцёраў Сэта Рогена і Роўз Бірн пасля камедыі «Суседзі. На сцежцы вайны» і яе сіквела.

«Фубар» (з 25 траўня на Netflix)

Бацька і дачка выпадкова высвятляюць, што яны абое таемна працуюць на ЦРУ. Так ужо і без таго рызыкоўнае заданне пад прыкрыццём ператвараецца ў складаную сямейную справу. Напэўна будзе крыху падобна на «Праўдзівую хлусню». Тут нам таксама абяцаюць сплаў баевіка і камедыі.

Першы серыял, у якім у Арнольда Шварцэнэгера галоўная роля. Не дзіўна, што аўтары праекта па максімуме эксплуатуюць легендарныя вобразы акцёра. Так, нават у трэйлеры ёсць адсылка да кароннай фразы Тэрмінатара «I’ll be back». Тут герой Арні прамаўляе: «I’m back, baby».

Над «Фубарам» працавалі Філ Абрахам і Нік Сантара, вядомыя па працах над такімі серыяламі, як «Сапрана», «Азарк», «Джэк Рычар».

«Onlíner па-беларуску» ў Telegram. Моўныя віктарыны, тэсты для аматараў вандровак і тэксты на роднай мове

Ёсць пра што расказаць? Пішыце ў наш тэлеграм-бот. Гэта ананімна і хутка