Што паглядзець у лістападзе. Топ кінапрэм'ер

15 281
31 октября 2022 в 16:23
Источник: Зміцер Адашкевіч

Што паглядзець у лістападзе. Топ кінапрэм'ер

Разыгрываем Playstation и Dyson в приложении Каталог Onlíner каждую пятницу

У кінатэатрах прэм'ер па-ранейшаму не густа. У нашай сённяшняй падборцы толькі два фільмы выйдуць у кінатэатральны пракат, а астатнія можна будзе паглядзець дома. Апошні восеньскі месяц ужо лічыцца «амаль святочным», таму будзе шмат сямейных і дзіцячых фільмаў.

«У эфіры» (з 4 лістапада ў кінатэатрах)

Рэжысёр: Рамуальд Буланжэ.

У ролях: Мэл Гібсан, Уільям Маўслі, Кевін Дылан.

Элвіс заслужыў рэпутацыю эксцэнтрычнага радыёвядучага. Падчас чарговага прамога эфіру яму ў студыю тэлефануе слухач і аб'яўляе, што заб'е сям'ю шоўмена. Цяпер Элвіс, не перарываючы прамога эфіру, вымушаны расказаць пра свае «шкілеты ў шафе», а заадно высветліць, хто ж яму патэлефанаваў.

Фільм заснаваны на кароткаметражцы «Гутарка», якая выйшла тры гады таму. Яе таксама зняў Рамуальд Буланжэ, які ў рэшце рэшт вырашыў перанесці гісторыю ў доўгі фармат. Да гэтага рэжысёр не адзначаўся поўнаметражнымі кінатэатральнымі карцінамі, так што «У эфіры» можна лічыць яго дэбютам.

Галоўная зорка стужкі, вядома ж, Мэл Гібсан. У апошнія некалькі гадоў акцёр даволі часта здымаецца, аднак запамінальных новых работ у яго няшмат, у адрозненне ад бытавых скандалаў.

«Мост праз возера» (з 4 лістапада на Apple TV+)

Рэжысёр: Ліла Нойгебаўэр.

У ролях: Джэніфер Лоўрэнс, Браян Тайры Генры, Лінда Эмонд, Джэйн Хадышэл.

Лінсі служыла інжынерам у Афганістане. Там яна атрымала чэрапна-мазгавую траўму і адправілася дадому ў Новы Арлеан на рэабілітацыю, дзе ў яе пад апекай пажылая маці і брат-наркаман. Выратавацца ад побытавай бязладзіцы дапамагае сяброўства з аўтамеханікам-інвалідам.

Праект студыі A24, стужкі якой славяцца неардынарнасцю і творчым падыходам нават да стандартных тэм. Галоўныя ролі сыгралі Джэніфер Лоўрэнс і Браян Тайры Генры. Падчас прэм'еры на кінафестывалі ў Таронта кінакрытыкі якраз нахвальвалі ўзаемадзеянне паміж двума акцёрамі.

У цэлым крытыкам «Мост праз возера» спадабаўся, а вось звычайныя гледачы, якія паспелі паглядзець кіно, не вельмі яго ўпадабалі. Увогуле, стандартная для фільмаў A24 сітуацыя.

«Энола Холмс 2» (з 4 лістапада на Netflix)

Рэжысёр: Гары Брэдбір.

У ролях: Мілі Бобі Браўн, Генры Кавіл, Хелена Бонэм Картэр, Дэвід Цьюліс.

Працяг фільма пра сястру Шэрлака Холмса. На гэты раз Энола бярэцца за разгадку таямніцы знікнення дзяўчыны. Праўда, адной ёй не справіцца — спатрэбіцца дапамога сяброў і брата Шэрлака.

Фільм па-ранейшаму заснаваны на фанфіках Нэнсі Спрынгер. Першая «Энола Холмс» не адрознівалася якасцю і арыгінальнасцю. Тым не менш многім гледачам гісторыя пра сястру Шэрлака Холмса прыйшлася даспадобы. У Netflix і не ўтойваюць, што наперадзе нас чакае яшчэ некалькі працягаў.

У галоўнай ролі па-ранейшаму занятая Мілі Бобі Браўн, якая стала знакамітай пасля ўвасаблення вобразу Адзінаццаць з «Вельмі дзіўных спраў». Дапамагаюць ёй іншыя славутасці. На гэты раз, акрамя Генры Кавіла, гэта таксама Хелена Бонэм Картэр і Дэвід Цьюліс.

«Дзіўны: Гісторыя Эла Янкавіча» (з 4 лістапада ў сеціве)

Рэжысёр: Эрык Апель.

У ролях: Дэніэл Рэдкліф, Эван Рэйчэл Вуд, «Дзіўны Эл» Янкавіч.

Байопік амерыканскага музыканта Эла Янкавіча, які стаў папулярным у 1980-х дзякуючы сваім парадыйным трэкам. Зрэшты, большасць фактаў з жыцця спевака, гавораць, у фільме пераблыталі. За гэта нясе адказнасць сам Эл, які напісаў сцэнарый для гэтай музычнай камедыі.

Праўда, выканаць галоўную ролю жывы і здаровы Янкавіч не пажадаў. За складаную справу ўзяўся Дэніэл Рэдкліф. Акцёр ужо даўно пазбавіўся ад амплуа Гары Потэра, аднак многія ўсё яшчэ схільныя асацыяваць яго з дзіцячай роляй. У рэжысёрскім крэсле сядзеў Эрык Апель, які працаваў сярод іншага над такімі серыяламі, як «Бруклін 9-9» і «Сіліконавая даліна».

Фільм вельмі цёпла сустрэлі на нядаўнім фестывалі ў Таронта. Тамака яго выдатна прынялі не толькі крытыкі, але і простыя гледачы. Гавораць, атрымалася вясёлае музычнае кіно.

«Незабыўныя Каляды» (з 10 лістапада на Netflix)

Рэжысёр: Джанін Даміян.

У ролях: Ліндсі Лохан, Корд Аверстрыт, Джордж Янг, Джэк Вагнер.

Страціўшы памяць у выніку няшчаснага выпадку на гарналыжным курорце, разбэшчаная наследніца на Каляды апынулася ва ўтульнай хаце няўдачлівага ўдаўца і яго дачкі. Далей — чарада перавыхаванняў, пераўвасабленняў і шчаслівыя слёзы ў фінале.

Рамантычная камедыя, якая ні на што не прэтэндуе і цікавая хіба што вяртаннем на экраны Ліндсі Лохан. Даўно яна не здымалася ў кіно, ды і апошнія яе працы годнымі, мякка кажучы, не назавеш. Тут жа знялася і яе малодшая сястра Алі.

«Татаў дракон» (з 11 лістапада на Netflix)

Рэжысёр: Нара Тумі.

Аднойчы хлопчык Элмер сустрэў бадзяжнага ката і даведаўся ад яго гісторыю маленькага дракончыка. Таго схапілі звяры Дзікага вострава і прымусілі служыць на пераправе праз шырокую каламутную раку, якая падзяляла востраў на дзве часткі. Нядоўга думаючы, Элмер сабраў заплечнік і выправіўся на пошукі дракончыка.

Экранізацыя аднайменнай казкі Рут Ганнетт, якая ўпершыню выйшла ў сярэдзіне мінулага стагоддзя. Кніжка атрымала ганаровы медаль Ньюберы, была перакладзена на мноства моў і вытрымала некалькі перавыданняў. А вось мульцікаў па ёй, здаецца, да Netflix так і не знялі.

Стылістычна «Татаў дракон» падобны на «Легенду пра ваўкоў». Гэта не дзіўна, таму што Нара Тумі таксама працавала над ім, няхай і не ў якасці рэжысёра.

«Цуд» (з 16 лістапада на Netflix)

Рэжысёр: Себасцьян Леліё.

У ролях: Флорэнс П'ю, Ніў Алгар, Кіран Хайндс, Том Берк, Тобі Джонс.

У 1862 годзе медсястра, спрабуючы перажыць гора, прыязджае з Англіі ў аддаленую ірландскую вёску. Тут ёй трэба разабрацца, як мясцовай 11-гадовай дзяўчынцы ўдаецца абыходзіцца без ежы. Тая нібыта не есць ужо чатыры месяцы і цудоўна сябе адчувае дзякуючы «манне нябеснай». Ці гэта не цуд?

Рэжысёрам карціны выступіў чыліец Себасцьян Леліё, які некалькі гадоў таму атрымаў «Оскар» у катэгорыі «Лепшы фільм на замежнай мове» — «Фантастычная жанчына». Што да «Цуду», то гэта кінаадаптацыя рамана Эмы Донах'ю. Яна яшчэ напісала кнігу «Пакой», якая таксама стала асновай для аднайменнага фільма.

У ролі медсястры знялася Флорэнс П'ю. Яе вы маглі бачыць у такіх фільмах, як «Маленькія жанчыны», «Чорная ўдава», «Сонцастаянне».

«Покерфэйс» (з 17 лістапада ў кінатэатрах)

Рэжысёр: Расэл Кроў.

У ролях: Расэл Кроў, Эльза Патакі, Ліам Хэмсварт.

Другая ў гэтым месяцы стужка, для прагляду якой можна схадзіць у кінатэатр. Праўда, ужо праз тыдзень пасля кінатэатральнай прэм'еры стужку выпусцяць на стрымінгавых сэрвісах. Жанр «Покерфэйса» абазначаюць як «картачны трылер». І, здаецца, такая характарыстыка вельмі пасуе гэтай карціне.

Азартны мільярдэр Джэйк Фоўлі арганізоўвае для сваіх сяброў чэмпіянат у покер. На коне вялікія грошы. Вось толькі гульцы не падазраюць, што за покерным сталом ім давядзецца адмовіцца ад галоўнага — сваіх сакрэтаў, якія ні за што не павінны былі стаць вядомымі іншым удзельнікам турніру.

«Покерфэйс» — праект Расэла Кроў. Ён тут і рэжысёр, і выканаўца галоўнай ролі, і сцэнарыст, і прадзюсар, і ўвогуле майстар на ўсе рукі. Таксама са славутасцей у фільме можна ўбачыць Ліама Хемсварта і Эльзу Патакі.

«Зачараваная 2» (з 18 лістапада на Disney+)

Рэжысёр: Адам Шэнкман.

У ролях: Эмі Адамс, Джэймс Марсдэн, Патрык Дэмпсі.

Доўгачаканы сіквел «Зачараванай». Першая частка выйшла яшчэ ў 2007 годзе і расказвала пра мульцяшную прынцэсу Жызэль, якая закахалася ў прыгожага прынца. З дапамогай чорнай магіі злая мачыха перанесла яе ў Манхэтэн — адзінае месца, дзе няма кахання. Аднак у выніку ў Жызэль, здаецца, атрымліваецца нядрэнна ўладкавацца.

Падзеі сіквела развіваюцца праз дзесяць гадоў. Аказваецца, гэта былі далёка не бясхмарныя гады. Жызэль надакучыў рэальны Нью-Ёрк, і, здаецца, яна не супраць вярнуцца да казачнага жыцця.

Як і ў арыгінале, чакаецца шмат песень і прыгожых лакацый. Пастаноўку фільма даверылі Адаму Шэнкману, аўтару «Вясельнага перапалоху», «Чаго жадаюць мужчыны», «Лака для валасоў». Да вобразу прынцэсы Жызэль вярнулася Эмі Адамс.

«У духу Каляд» (з 18 лістапада на Apple TV+)

Рэжысёры: Шон Андэрс і Джон Морыс.

У ролях: Раян Рэйнальдс, Уіл Ферэл, Актавія Спэнсер.

Чарговая экранізацыя класічнай каляднай аповесці-казкі Чарльза Дзікенса «Калядная песня ў прозе: каляднае апавяданне з прывідамі». Яе цэнтральны персанаж — лонданскі скнара Эбенізер Скрудж. Перад Калядамі яго наведваюць розныя духі, якім удаецца прымусіць Скруджа змяніцца і стаць больш добрым.

На гэты раз класічны твор ператварылі ў мюзікл, а час дзеянняў перанеслі ў сучаснасць. Дух, мяркуючы па ўсім, будзе адзін, і ўвасобіў яго Раян Рэйнальдс. У ролі скнары — Уіл Ферэл. Над музычнымі нумарамі працавалі пастаноўшчыкі «Ла-Ла Лэнда».


Реклама
Тариф «Бесконечный»


Бесконечный интернет и сотни минут для общения! 

Общайся, создавай контент, смотри сериалы и TikTok всего за 8,9 рублей в месяц на тарифе «Бесконечный».

Подробнее — на life.com.by.

Наш канал у Telegram. Далучайцеся!

Ёсць пра што расказаць? Пішыце ў наш тэлеграм-бот. Гэта ананімна і хутка

Источник: Зміцер Адашкевіч