25 128
02 октября 2022 в 11:00
Источник: Зміцер Адашкевіч

Якія серыялы паглядзець у кастрычніку

Разыгрываем Playstation и Dyson в приложении Каталог Onlíner каждую пятницу

Сярэдзіна восені абяцае быць гарачай на серыяльныя прэм'еры. На фоне «Уладара пярсцёнкаў» і «Дома Драконаў» стрымінгавыя сэрвісы яшчэ больш пашыраюць спіс патэнцыйна цікавых прэм'ер. Тут і рэмэйк «Інтэрв'ю з вампірам», і чарговыя «Зорныя войны», і некалькі гучных кніжных экранізацый.

«Інтэрв'ю з вампірам» (з 2 кастрычніка на AMC)

Двухсотгадовы вампір па імені Луі расказвае журналісту Малай гісторыю свайго жыцця. Шматсерыйная адаптацыя рамана Эн Райс, па якім у 1994 годзе быў зняты цудоўны фільм з Томам Крузам, Брэдам Пітам і Кірстэн Данст у галоўных ролях.

У серыяле ролю вампіра Луі выканаў Джэйкаб Андэрсан (у фільме гэта быў Брэд Піт). Джэйкаба вы маглі запомніць па ролі Шэрага Чарвяка ў «Гульні тронаў». Вампіра Лестата сыграў Сэм Рыд, вобраз якога будуць параўноўваць з роллю Тома Круза. Шоуранерам значыцца Алан Тэйлар — адзін з суаўтараў «Гульні тронаў».

Калі меркаваць па пачатковых водгуках крытыкаў, серыял атрымаўся. У AMC так натхніліся першымі рэцэнзіямі, што адразу працягнулі праект на другі сезон яшчэ да агульнадаступнай прэм'еры. А ўлічваючы, што кампанія купіла правы на 18 кніг Эн Райс, ад AMC можна чакаць новых серыялаў і фільмаў пра вампіраў як мінімум штогод.

«Сябар сям’і» (з 6 кастрычніка на Peacock)

Міні-серыял, у аснове якога — рэальная гісторыя пра амерыканскае сямейства Блоберг. У 1970-х гадах у іх двойчы выкрадалі дачку — ва ўзросце 12 і 14 гадоў. Абодва разы за выкраданнямі стаяў сусед і блізкі сябар сям'і Роберт Берхтальд.

Падчас першага выкрадання Берхтальд унушыў дзяўчынцы, што яна іншапланецянка, якой трэба пераспаць з чалавекам дзеля выратавання сваёй расы. У той раз «іншапланецянку» выратавалі супрацоўнікі ФБР. Аднак на гэтым пакуты дзяўчынкі не скончыліся, бо яе бацькоў чамусьці не збянтэжылі паводзіны «сябра сям’і».

Аўтары серыяла на першы план вывелі самога злачынцу і прапанавалі яго псіхалагічны партрэт. Аўтарам серыяла было цікава, як па сутнасці старонні чалавек змог настроіць адзін супраць аднаго членаў сям'і Блоберг і раз'яднаць іх.

«Клуб паўночнікаў» (з 7 кастрычніка на Netflix)

Члены таемнага клуба ў хоспісе для падлеткаў збіраюцца па начах і расказваюць адзін аднаму страшныя гісторыі. А аднойчы яны даюць абяцанне: той, хто памрэ першым, павінен падаць астатнім знак з таго свету. Самі разумееце, што доўга чакаць не давядзецца.

Цікавостка гісторыі ў тым, што хлопцы ўжываюць галюцынагенныя лекі, таму не заўсёды зразумела, дзе на экране рэальнасць, а дзе выдумка. Дадалі ў серыял і іншых таямніц. Напрыклад, легенду пра панацэю, якая ёсць у хоспісе і якая аднойчы ўжо выратавала нейкую дзяўчынку ад смерці.

Хорар Майка Флэнегана, вядомага па такіх праектах, як «Прывід дома на ўзгорку», «Прывіды сядзібы Блай» і «Паўночная імша». Праўда, на гэты раз яго новая работа, здаецца, разлічана на больш юную аўдыторыю.

«Упусці мяне» (з 9 кастрычніка на Showtime)

Дзесяцісерыйная адаптацыя вядомага шведскага фільма жахаў 2008 года. Той фільм сам быў адаптацыяй аднайменнага рамана, а потым паслужыў базай для амерыканскага фільма. Такая няпростая гісторыя.

Дзесяць гадоў таму Элеанор ператварылася ў вампіра. З таго часу яна заўсёды выглядае як 12-гадовая дзяўчынка. Яна разам з бацькам жыве ціхенька і на вуліцу выходзіць толькі па начах. Тата ўвесь час заняты пошукамі крыві для дачкі. Аднойчы яны вырашаюць вярнуцца ў Нью-Ёрк, дзе разлічваюць знайсці лекі ад вампірызму.

Бацьку маленькай вампіршы сыграў Дэміян Бічыр. Адаптацыяй рамана займаўся Эндру Хіндэракер, сцэнарыст серыяла «Страшныя казкі».

«Вінчэстэры» (з 11 кастрычніка на CW)

Прыквел «Звышнатуральнага», які раскажа гісторыю кахання бацькоў Дзіна і Сэма Вінчэстэраў. Джон служыў у В'етнаме, вяртаецца дадому і знаёміцца з юнай Мэры. Яна палюе на дэманаў і ўсімі сіламі абараняе свет ад зла.

Шоуранерам серыяла выступае Робі Томпсан, які таксама працаваў над «Звышнатуральным». У цэлым шматлікія члены каманды «Вінчэстэраў» перайшлі з арыгінальнага шоу, так што яго прыхільнікі сапраўды будуць задаволеныя.

«Назіральнік» (з 13 кастрычніка на Netflix)

Сямейная пара пераязджае ў, як ім здаецца, дом сваёй мары ў прыгарадзе Нью-Джэрсі. Аднак неўзабаве мужа і жонку пачынае тэрарызаваць незнаёмец, які называе сябе Назіральнікам. Ад яго ўвесь час прыходзяць страшныя пасланні з пагрозамі. Яшчэ і суседзі паводзяць сябе падазрона і дзіўна.

Апісанне сюжэту падобнае на які-небудзь містычны хорар. Але не, «Назіральнік» заснаваны на рэальнай гісторыі, пра якую амерыканскія газеты актыўна пісалі ў 2014 годзе. Усю гісторыю змясцілі ў сем серый, якія выйдуць у адзін дзень.

У «Назіральніка» зорны акцёрскі склад. Галоўных герояў іграюць Наомі Уотс і Бобі Канавале. Актрыса вядомая па ролях у фільмах «Званок», «Кінг-Конг», «Дзіяна: Гісторыя кахання» і многіх іншых. Канавале здымаўся ў «Ірландцы», «Чалавеку-мурашы» і серыяле «Трэцяя змена». Таксама ў праекце заняты Міа Фэраў і Джэніфер Кулідж.

«Шантарам» (з 14 кастрычніка на Apple TV+)

Доўгачаканая экранізацыя аднайменнага рамана, правы на які Apple набыла яшчэ ў 2018 годзе. Спачатку планавалася зняць поўнаметражны фільм, аднак неўзабаве пасля пачатку працы стала зразумела: гэтай гісторыі вельмі цесна ў рамках адной карціны.

1980-я гады. Былы грабежнік і наркаман Лін (пазней яму дадуць новую мянушку — Шантарам) збягае з аўстралійскай турмы і накіроўваецца ў Індыю. Тамака яго чакае велізарная колькасць прыгод, уключаючы здымкі ў кіно, працу кантрабандыстам, падробку пашпартоў, стасункі з мафіяй, вайну і лячэнне жыхароў трушчоб.

Галоўная роля дасталася 42-гадоваму Чарлі Ханэму. З яго нядаўніх прац — «Джэнтльмены», «Меч караля Артура», «Сапраўдная гісторыя банды Кэлі». Дарэчы, рэжысёр апошняй таксама з'яўляецца і адным з рэжысёраў «Шантарама».

«Перыферыйныя прылады» (з 21 кастрычніка на Amazon Prime Video)

Навукова-фантастычны серыял ад стваральнікаў «Свету Дзікага Захаду». Недалёкая будучыня. Юная Флін працуе ў 3D-друкарні і любіць гульні ў віртуальнай рэальнасці. Аднойчы брат дзяўчыны прапануе ёй патэсціраваць эксперыментальную відэагульню. Але што, калі падзеі, якія адбываюцца ў віртуальнасці, у тым ліку жудаснае забойства, на самой справе рэальныя?

Серыял зняты паводле аднайменнага бестселера Уільяма Гібсана. У галоўнай ролі — Хлоя Грэйс Морэц. Пасля «Піпца» юная актрыса здымалася часта, аднак удалыя праекты можна пералічыць па пальцах адной рукі. Магчыма, у серыяльным фармаце ў дзяўчыны атрымаецца перазагрузіць кар'еру.

«Кабінет рэдкасцяў Гільерма дэль Тора» (з 25 кастрычніка на Netflix)

Анталогія жахаў. Кожная серыя адабрана асабіста Гільерма дэль Тора. Сам ён ніводнага эпізоду не рэжысіраваў, аднак напісаў сцэнарыі для дзвюх з васьмі серый. Многія з астатніх уяўляюць сабой пераасэнсаваныя сюжэты апавяданняў Лаўкрафта.

Кожны з васьмі рэжысёраў, можа, і не надта вядомы шырокай грамадскасці, але насамрэч зарэкамендаваў сябе ў сферы кіно. Гэта і аскараносны аператар, і аўтар «Куба», і адзначаныя на Венецыянскім фестывалі кінематаграфісты.

«Кабінет рэдкасцяў Гільерма дэль Тора» будзе выходзіць па нязвыклай для Netflix схеме. Замест таго, каб адразу выпусціць усе восем серый, кампанія кожны дзень будзе паказваць па два эпізоды.

«Зорныя войны: Паданні пра джэдаяў» (з 26 кастрычніка на Disney+)

Анімацыйны серыял-анталогія ў сусвеце «Зорных войнаў». Створаны ў тым жа стылі, што «Зорныя войны: Войны клонаў» і «Зорныя войны: Бракаваная партыя». У новым серыяле ўвагу засяродзяць на раскрыцці характараў Квай-Гон Джына, графа Дуку і Асакі Тана. Усе шэсць 15-хвілінных эпізодаў выйдуць у адзін дзень.

Наш канал у Telegram. Далучайцеся!

Ёсць пра што расказаць? Пішыце ў наш тэлеграм-бот. Гэта ананімна і хутка

Источник: Зміцер Адашкевіч