Чып і Дэйл, дыназаўры і «Зорныя войны». Што паглядзець у траўні

18 020
29 апреля 2022 в 8:00
Источник: Зміцер Адашкевіч

Чып і Дэйл, дыназаўры і «Зорныя войны». Што паглядзець у траўні

Источник: Зміцер Адашкевіч

Кінатэатральныя прэм'еры зусім сцішыліся. Сусветныя студыі адмаўляюцца ад пракату новых блокбастараў у нашай краіне. Гэта азначае, што ў траўні мы не ўбачым як мінімум «Топ Ган: Мэверык» і «Доктар Стрэндж: У мультысусвеце вар'яцтва». Ратуюць толькі стрымінгавыя сэрвісы, таму гэтым разам амаль усе навіны пра іх.

Фільмы

На жаль, кінапрэм'ер да нас дойдзе вельмі мала. Пакуль цывілізаванаму свету будуць паказваць «Топ Гана» і «Доктара Стрэнджа», у нас можна разлічваць толькі на нешматлікія прэм'еры стрымінгавых сэрвісаў ды адзіны фільм, які быццам выпадкова прарваўся ў сетку вяшчання кінатэатраў.

«Тая, што запальвае позіркам» (з 12 траўня ў сеціве)

Адзін з нямногіх кінарэлізаў, які атрымаецца паглядзець амаль адначасова з усім светам. Усё таму, што стужку адразу пачнуць паказваць і ў кінатэатрах, і на стрымінгавых сэрвісах. У нас у кіно «Тую, што запальвае позіркам» не завязуць, а вось у інтэрнэце яна сапраўды з'явіцца.

Чарлі — незвычайная дзяўчынка. Яна сілай мыслення можа запальваць прадметы. Дзіўная і небяспечная здольнасць, якая моцна цікавіць улады. Вось ужо дзесяць гадоў яе бацька спрабуе засцерагчы сям'ю ад залішняй увагі вайскоўцаў. З кожным годам хавацца становіцца ўсё больш складана. І аднойчы менавіта Чарлі трэба будзе ўстаць на абарону родных.

Гэта экранізацыя аднайменнага рамана Стывена Кінга ад кінакампаніі Blumhouse, на рахунку якой такія моцныя хорары, як «Прэч» і «Хэлоўін забівае». Ролю бацькі Чарлі сыграў Зак Эфрон.

«Чып і Дэйл — бурундучкі-ратавальнічкі» (з 20 траўня на Disney+)

Некаторыя, напэўна, памятаюць мультсерыял пра антрапаморфных бурундукоў, які ў нас быў надзвычай папулярны ў пачатку 1990-х. У мінулым годзе Disney выпусціла кашмарны мульцяшны спін-оф, які мае мала агульнага з арыгіналам. А вось новы «Чып і Дэйл — бурундучкі-ратавальнічкі» — зусім іншая справа.

Прайшло 30 гадоў пасля падзей мультсерыяла. Дэйл зрабіў сабе CGI-аперацыю і стаў трохмерным, а Ракфор зусім з’ехаў з глузду на глебе любові да сыру. Некалі паважаныя ўсімі героі марнеюць у невядомасці. Аднойчы прадзюсар прапануе аднавіць шоу, але грызуны адмаўляюцца. Замест гэтага ім давядзецца ратаваць планету ад страшэннай напасці.

Цяперашні «Чып і Дэйл — бурундучкі-ратавальнічкі» — не столькі мульцік, колькі фільм, які сумяшчае ў сабе анімацыйныя і натурныя здымкі. Акрамя асноўных герояў, у трэйлеры таксама мільгаюць персанажы з іншых дыснееўскіх праектаў, у тым ліку «Аладзіна».

«Святым тут не месца» (з 27 траўня ў кінатэатрах)

А вось і той самы адзіны патэнцыйна цікавы фільм, які нейкім цудам дабраўся да нашых кінатэатраў. Мусіць, таму, што мексіканскі і ад малавядомага дыстрыб'ютара.

Езуіт — жорсткі забойца, які, аднак, трапіў у турму па іншай справе. Калі ён выходзіць, то даведваецца, што яго жонку забілі, а сына выкралі і адвезлі ў Мексіку. Спрабуючы вярнуць дзіця, Езуіт ставіць на вушы ўвесь злачынны свет.

Такая бадзёрая сумесь з «Джона Уіка», «Закладніцы» і «Ніхто». Сцэнарый для фільма напісаў мацёры Пол Шродэр, адказны за гісторыі ў такіх стужках, як «Шалёны бык», «Таксіст» і «Халодны разлік». Не менш адметны і акцёрскі склад, у якім можна сустрэць Ціма Рота і Рона Перлмана.

Серыялы

А вось цікавых серыялаў у траўні будзе куды больш, чым поўнаметражных фільмаў. Так, 5 траўня пакажуць чарговы «Зорны шлях», 20-га на Netflix выйдзе трэці сезон анталогіі мультфільмаў «Каханне. Смерць. Робаты», а 27-га там жа — чацвёрты сезон «Вельмі дзіўных спраў». Далей жа раскажам пра зусім новыя праекты.

«Пентаверат» (з 5 траўня на Netflix)

Таемнае грамадства, якое шмат стагоддзяў уплывала на падзеі ў свеце, сутыкаецца з унутранай пагрозай. Ці зможа канадскі рэпарцёр выратаваць іх і ўвесь свет?

Гэта праект Майка Майерса, які ўжо даўно не з'яўляўся на экранах. Як і ў «Осціне Паўэрсе», у «Пентавераце» ён сыграе некалькі персанажаў. Гэтым разам у акцёра аж восем роляў! Усяго нас чакае шэсць серый, для кожнай з якіх Майк Майерс напісаў сцэнарый. Заадно яшчэ і прадзюсарам выступіў.

«Лесвіца» (з 5 траўня на HBO Max)

Глыбокай ноччу 9 снежня 2001 года ў службу 911 патэлефанаваў пісьменнік і журналіст Майкл Пітэрсан. Зрывістым голасам ён паведаміў аб тым, што яго жонка ўпала з лесвіцы і памерла. Вось толькі ў следства ўзніклі пытанні да самога Майкла. Хто ж ён — няшчасны ўдавец і выпадковая ахвяра правасуддзя або цынічны злачынец, пра рэальнае жыццё якога не падазравалі нават яго дзеці?

Падрабязнасці гісторыі лепш не гугліць. Праўда, здаецца, што і ў адваротным выпадку вам, хутчэй за ўсё, спадабаецца «Лесвіца». Па-першае, падобна, што кіно знята з вялікай увагай да дэталяў. Па-другое, прыемна здзіўляе каст. Майкла сыграў Колін Ферт, а яго жонку — Тоні Колет. Акрамя таго, тут можна ўбачыць Жульет Бінош, Дэйна ДэХаана, Сафі Тэрнер і сына Арнольда Шварцэнэгера.

«Змяя Эсэкса» (з 13 траўня на Apple TV+)

Канец XIX стагоддзя. Пасля смерці мужа Кора разам з сынам і сяброўкай-марксісткай пераязджае з шумнага Лондана ў глухую вёску графства Эсэкс. Мясцовыя жыхары ўзбуджаны з-за выхадак вялізнага змея, які, паводле іх слоў, пажырае людзей. Кора і вясковы вікарый аб'ядноўваюць намаганні, каб знайсці змея і развянчаць (а можа, і пацвердзіць) міфы пра яго.

Першапачаткова на ролю Коры планавалі ўзяць Кіру Найтлі. Аднак яна адмовілася ад здымак з-за боязі заразіцца каранавірусам. У выніку роля дасталася Клэр Дэйнс. Вікарыя сыграў Том Хідлстан, больш за ўсё вядомы па ролі Локі. У якасці першакрыніцы для «Змяі Эсэкса» паслужыла аднайменная кніга Сары Пэры, якая стала бестселерам.

«Жонка вандроўніка ў часе» (з 15 траўня на HBO)

Чарговая экранізацыя бестселера Одры Ніфенегер. У серыяле расказваецца гісторыя пары Генры і Клэр. Ён пакутуе ад рэдкага генетычнага захворвання, з-за якога змушаны бескантрольна перамяшчацца ў часе. Яна сустракаецца з ім на працягу ўсяго свайго жыцця, пачынаючы з самага ранняга дзяцінства.

У 2009 годзе выйшла не вельмі ўдалая поўнаметражная экранізацыя гэтага любоўна-фантастычнага рамана. Цяпер брытанцы падышлі да пытання больш грунтоўна і абяцаюць не спяшацца, вылучыўшы на ўсю гісторыю амаль шэсць гадзін. Дарэчы, рэжысёр стужкі Дэвід Натэр раней удзельнічаў у здымках «Гульні тронаў», выпусціўшы шэсць серый.

«Анджэлін» (з 19 траўня на Peacock)

Міні-серыял пра Анджэлін — амерыканскую зорку 1980-х, якая заваявала папулярнасць дзякуючы сваім выявам рознай ступені прыстойнасці на білбордах Лос-Анджэлеса. Уладальніца нестандартных, але выдатных форм на ўсю моц эксплуатавала вобраз яркай поп-іконы, раз'язджаючы па Галівудзе на ружовым аўтамабілі, даючы шматлікія інтэрв'ю і здымаючыся ў дзясятках шоу.

У аснове серыяла — расследаванне журналіста The Hollywood Reporter. Ён даведаўся, што Анджэлін нарадзілася ў Польшчы, а яе сапраўднае імя — Рэні Голдберг. Разам з сям'ёй яна перабралася ў ЗША, дзе, пасталеўшы, прыдумала выяву раскошнай бландзінкі з вялізным бюстам.

Серыял, спрадзюсаваны між іншым самой Анджэлін, павінен быў выйсці яшчэ два гады таму. З-за пандэміі прэм'еру прыйшлося перанесці, затое зараз усе восем серый выйдуць у адзін дзень.

«Дагістарычная планета» (з 23 траўня на Apple TV+)

Новая серыя дакументальных фільмаў ад Джона Фаўро і прадзюсараў серыяла «Планета Зямля» пазнаёміць гледачоў з раней нябачанымі цудамі нашага свету. Нас вернуць на 66 мільёнаў гадоў таму, калі зямлю, акіяны і неба засялялі велічныя дыназаўры і мноства іншых незвычайных істот.

Стварэннем серыяла займаецца ВВС. У працэсе здымак выкарыстоўваліся самыя актуальныя палеанталагічныя дадзеныя, у тым ліку аб пёравым покрыве некаторых дыназаўраў. Камп'ютарных звяркоў намалявалі ў кампаніі Moving Picture Compan, якая ўжо адзначылася выдатным візуальным узроўнем у нядаўніх праектах Джона Фаўро «Кніга джунгляў» і «Кароль Леў». Музыку для праекта напісаў Ханс Цымер.

«Обі-Ван Кенобі» (з 27 траўня на Disney+)

Адзін з самых чаканых у гэтым годзе серыялаў. «Обі-Ван Кенобі» раскажа пра падзеі, якія здарыліся праз 10 гадоў пасля апісаных у фільме «Зорныя войны: Эпізод 3 — Помста сітхаў» і за 9 гадоў да «Новай надзеі». Мяркуючы па ўсім, асноўныя дзеянні будуць разгортвацца на Татуіне. Обі-Ван Кенобі хаваецца ад паляўнічых Імперыі і прыглядвае за юным Люкам Скайуокерам.

У серыяле здымаецца Юэн МакГрэгар, які і стане цэнтральным персанажам. Хэйдэн Крыстэнсэн з'явіцца ў вобразе Энакіна Скайуокера, які перайшоў на цёмны бок. Рэжысёрам праекта выступае Дэбара Чоу, знаёмая з сусветам «Зорных войнаў» дзякуючы працы над серыялам «Мандалорац».


Onlíner рекомендует
32" 1920x1080 (Full HD), частота матрицы 60 Гц, индекс динамичных сцен 1000, Smart TV (Samsung Tizen), Wi-Fi
Выбор покупателей
32" 1366x768 (HD), частота матрицы 60 Гц, Smart TV (Android TV), Wi-Fi
Onlíner рекомендует
43" 3840x2160 (4K UHD), матрица IPS, частота матрицы 60 Гц, Smart TV (LG webOS), HDR, Wi-Fi
Onlíner рекомендует
55" 3840x2160 (4K UHD), матрица OLED, частота матрицы 120 Гц, Smart TV (LG webOS), HDR, Wi-Fi

Наш канал у Telegram. Далучайцеся!

Ёсць пра што расказаць? Пішыце ў наш тэлеграм-бот. Гэта ананімна і хутка

Перадрук тэксту і фотаздымкаў Onlíner без дазволу рэдакцыі забаронены. ng@onliner.by